Advanced SQL & Database Development

Advanced SQL & Database Development është një kurs i avancuar që synon të zhvillojë aftësitë profesionale të studentëve në programimin, menaxhimin e logjikës dhe optimizimin e bazave të të dhënave relacionale. Ky kurs përfaqëson nivelin e tretë të programit të studimit të bazave të të dhënave dhe është vazhdim i drejtpërdrejtë i kursit Relational Databases & SQL. Ai është konceptuar për studentët që zotërojnë njohuritë themelore të SQL dhe dëshirojnë të kalojnë drejt zhvillimit të zgjidhjeve komplekse dhe efikase. Gjatë kursit, studentët do të thellojnë njohuritë në formulimin e pyetjeve SQL të avancuara, duke përdorur nënpyetje të ndërlidhura, Common Table Expressions (CTE), Recursive Queries, Window Functions dhe teknika të avancuara të përpunimit, grupimit dhe analizës së të dhënave. Një pjesë e rëndësishme i kushtohet programimit të bazave të të dhënave nëpërmjet Stored Procedures, User-Defined Functions, Views dhe Triggers, duke mësuar si të implementohen rregullat e biznesit, të automatizohen operacionet dhe të ruhet integriteti i të dhënave. Studentët do të studiojnë gjithashtu Transactions dhe parimet ACID, nivelet e izolimit, mekanizmat e bllokimit (Locking), kontrollin e aksesit të njëkohshëm (Concurrency Control) dhe identifikimin e problemeve si Deadlocks, Dirty Reads dhe Lost Updates. Pjesa përmbyllëse e kursit trajton bazat e optimizimit të performancës përmes indekseve, analizës së planeve të ekzekutimit, identifikimit të query-ve joefikase dhe përmirësimit të tyre. Metodologjia e mësimdhënies kombinon shpjegimet teorike me demonstrime praktike, ushtrime SQL, raste studimore, detyra individuale dhe zgjidhjen e problemeve reale. Projekti final konsiston në zgjerimin e një baze të dhënash relacionale ekzistuese, përmes implementimit të komponentëve të programueshëm, operacioneve transaksionale dhe teknikave të optimizimit. Në përfundim të kursit, studentët do të jenë të aftë të zhvillojnë zgjidhje të avancuara në nivel databaze, të analizojnë sjelljen e transaksioneve dhe të përmirësojnë efikasitetin e operacioneve SQL.